မြ၀တီ-မဲဆောက်နယ်စပ်တွင် ယခုလလယ်ပိုင်းမှစ၍ ဆိုင်ကယ်အရောင်းအ၀ယ် ပြန်လည်ကောင်းမွန်လာကာ ထိုင်းဘက်ခြမ်း မှ ဆိုင်ကယ်အစီးရေ ၅၀နီးပါးမှာ တရားမဝင် ဂိတ်အချို့မှတဆင့် မြန်မာဘက်ခြမ်းသို့ နေ့စဉ် ပို့ဆောင်သယ်ယူလျှက်ရှိသည်ဟု သိရသည်။
ထိုကဲ့သို့ အရောင်းအ၀ယ် ပြန်ကောင်းလာသည့် တရားမ၀င် ယူသွင်းသော ဆိုင်ကယ်များကို လိုင်စင်မဲ့အဖြစ် မြ၀တီမြို့တွင်း ဖမ်းဆီးမှုများရှိသော်လည်း ယခုအခါ တစ်စီးလျှင် ဒဏ်ငွေ ၅၀၀၀ကျပ် ပေးဆောင်ခြင်းဖြင့် ဖြေရှင်းနိုင်ကြောင်း အမည်မဖော်လို သူ မြ၀တီမြို့မှ ဆိုင်ကယ်ပွဲစားတစ်ဦးက ယခုလို ပြောသည်။
သူက “အခုက ဆိုင်ကယ် အရောင်းအဝယ် ပြန်ကောင်းလာပြီလေ။ ဒါပေမဲ့ ဆိုင်ကယ်ကူးတာ ညဘက်တွေပဲလေ။ ဆိုင်ကယ် က တစ်ည တစ်ညကို အစီး ၅၀လောက် အနည်းဆုံး ၀င်တယ်။ ကမ်းကူးခကတော့ တစ်စီးကို ကျပ် တစ်သောင်းခွဲပေးရတယ်။ မြဝတီမြို့ထဲမှာတော့ စပလိုင်းချက်နဲ့ လိုင်စင်မရှိရင် ဖမ်းပေမဲ့ ဒဏ်ငွေ ၅,၀၀၀ ပေးလိုက်ရင် ပြီးတာပဲလေ။”ဟု ကေအိုင်စီကို ပြောသည်။
ယခု လက်ရှိအချိန်တွင် ထိုင်းနိုင်ငံမှ မြန်မာဘက်ခြမ်း မြဝတီသို့ တရားမ၀င် ဂိတ်များဖြစ်သည့် (၇)ဂိတ်နှင့် (၉၉၉)သုံးလုံး ဂိတ် ကြားရှိ (၁၁)ဂိတ်မှ တင်သွင်းနေခြင်းဖြစ်သည်။ ထိုဂိတ်တွင် စသုံးလုံး၊ စုံစမ်းစစ်ဆေးရေး၊ မူးယစ်အဖွဲ့၊ ပြည်သူ့စစ်၊ စစ်တပ် စသည့် အဖွဲ့အစည်းများရှိကြောင်း သိရသည်။
အများစု ယူသွင်းနေသော ဆိုင်ကယ်အမျိုးအစားများမှာ ဘတ်ငွေ ၅၃,၅၀၀ ဈေးနှုန်းရှိသည့် (Dream)မော်ဒယ် 2010/125 Step အစိမ်းရောင်နှင့် အခြားအမျိုးအစားမှာ ဈေးနှုန်းမှာ ဘတ်ငွေ ၅၇,၀၀၀ရှိသည့် (Wave)မော်ဒယ် 2010/125 Step ခဲ ရောင်၊ အမဲ၊ ပုလဲနက်ရောင်တို့ ဖြစ်သည်။
၎င်းဆိုင်ကယ်များကို မြ၀တီမြို့မှ ဖားအံမြို့အထိ ပို့ဆောင်သွားပြီး ထိုမှတဆင့် ပဲခူး၊ မော်လမြိုင် စသည့်အခြားမြို့များသို့ ပို့ ဆောင်ရောင်းဝယ်လျှက်ရှိပြီး လမ်းခရီးတစ်လျှောက်ရှိ ဂိတ်အဆင့်ဆင့်ကို သက်ဆိုင်ရာက သတ်မှတ်သည့်နှုန်းထားဖြင့် ပေး ဆောင်သွားရကြောင်း ဆိုင်ကယ်ကုန်သည်များက ပြောသည်။
ပြီးခဲ့သည့် ဇူလိုင်လ ၁၈ရက်နေ့မှစ၍ ထိုင်း-မြန်မာနယ်စပ် ချစ်ကြည်ရေးတံတား အပါအ၀င် တရားမ၀င် ဂိတ်ပေါင်းများစွာကို မြန်မာအာဏာပိုင်များက ပိတ်ခဲ့ပြီးနောက်ပိုင်း ဆိုင်ကယ်ရောင်းဝယ်အား ကျဆင်းလာရာမှ ယခုလတွင် ပြန်လည်ကောင်းမွန် လာခြင်းဖြစ်သည်။
No comments:
Post a Comment