ဦးဝင်းတင် (ဓာတ်ပုံ - အေပီ)
မြန်မာနိုင်ငံအပေါ် စီးပွားရေးပိတ်ဆို့ အရေးယူထားမှုကို ရုပ်သိမ်းပေးရန် အာဆီယံအဖွဲ့၏ တောင်းဆိုမှုသည် ရိုးသားမှု မရှိသဖြင့် မထောက်ခံဟု ဦးဝင်းတင်က ပြောသည်။
“အာဆီယံ အဖွဲ့က တောင်းဆိုတာတွေဟာ စစ်အစိုးရရဲ့ အလိုကျ လိုက်ပြီးတော့ တောင်းဆိုတာသာဖြစ်တယ်” ဟု ၎င်းက ဆိုသည်။
အင်ဒိုနီးရှားနိုင်ငံ Lombok ကျွန်း၌ ကျင်းပနေသော အာဆီယံနိုင်ငံခြားရေး ၀န်ကြီးများ အစည်းအဝေးအပြီးတွင် အာဆီယံ၏ အလှည့်ကျ ဥက္ကဋ္ဌ တာဝန်ယူထားသူ အင်ဒိုနီးရှားနိုင်ငံခြားရေး ၀န်ကြီး Marty Natalegawa နှင့်အာဆီယံ နိုင်ငံခြားရေး ၀န်ကြီးများက မြန်မာနိုင်ငံအပေါ် အမေရိကန်နှင့် အနောက်နိုင်ငံများ၏ စီးပွားရေးပိတ်ဆို့အရေးယူမှု ရုပ်သိမ်းပေးရန် မနေ့က တောင်းဆိုလိုက်ခြင်း ဖြစ်သည်။
အာဆီယံ၏ တောင်းဆိုမှုသည် အခြေအမြစ်မရှိသော လုပ်ရပ်သာဖြစ်ကြောင်း၊ အမေရိကန်နှင့် အနောက်နိုင်ငံများက စီးပွားရေး ပိတ်ဆို့မှုသည် ပြည်သူများအား ထိခိုက်မှု မရှိဘဲ စစ်အစိုးရနှင့် အပေါင်းပါများကိုသာ ထိခိုက်ကြောင်း၊ စီးပွားရေး ပိတ်ဆို့မှုသည် မြန်မာ့နိုင်ငံရေး အပြောင်းအလဲအတွက် လိုအပ်သော အရာဖြစ်ကြောင်း ဦးဝင်းတင်က ပြောသည်။
စီးပွားရေးပိတ်ဆို့ထားမှုသည် လူ့အခွင့်ရေးချိုးဖောက်ခြင်း၊ ပြည်သူများအား ဖိနှိပ်ခြင်း စသည့်အကြောင်းအရာများကြောင့် ကမ္ဘာ့ထုံးစံအတိုင်း လုပ်ဆောင်ခြင်းသာ ဖြစ်ကြောင်း၊ ၎င်းတို့အနေဖြင့် ဖိတ်ခေါ်ထားခြင်း မဟုတ်ကြောင်း၊ စစ်အစိုးရ အနေဖြင့် မြန်မာ့နိုင်ငံရေးကို လက်တွေ့ကျကျ အပြောင်းအလဲ လုပ်ဆောင်ပါက စီးပွားရေး ပိတ်ဆို့မှုသည် တောင်းဆိုစရာ မလိုဘဲ ကွယ်ပျောက်သွားမည့် အရာသာ ဖြစ်ကြောင်း ၎င်းက ဆက်ပြောသည်။
“ပိတ်ဆို့မှုတွေကြောင့် ဒီမိုကရေစီနဲ့ ပတ်သက်လို့ ထိရောက်တာတွေရှိတယ်။ ဒါကြောင့် ကျနော်တို့က လက်ခံတာပါ” ဟုလည်း ဦးဝင်းတင်က ပြောသည်။
မြန်မာနိုင်ငံသည် ဒီမိုကရေစီအသွင်ကူးပြောင်းရေးအတွက် လုပ်ဆောင်နေသည့်အပြင် နိုင်ငံရေး အခြေအနေ ပြောင်းလဲ တိုးတက်မှု များရှိလာ၍ စီးပွားရေးပိတ်ဆို့ထားမှု ဖယ်ရှားရေး၊ လျှော့ပေါ့ရေး တို့ကို လုပ်ဆောင်ပေးရန် အမေရိကန်အစိုးရနှင့် အနောက်နိုင်ငံများကို အာဆီယံအဖွဲ့က တောင်းဆိုခဲ့သည်။
အာဆီယံအဖွဲ့က မြန်မာ့နိုင်ငံရေးလုပ်ငန်းစဉ်များ၌ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည် ပါဝင်နိုင်ရေးနှင့် အမျိုးသားပြန်လည် သင့်မြတ်ရေးတို့ကို အဓိကထား လုပ်ဆောင်ရန်အတွက် နအဖ စစ်အစိုးရအားတောင်းဆို ထားသည်။
အာဆီယံအဖွဲ့ကဲ့သို့ပင် ရွေးကောက်ပွဲအနိုင်ရ တိုင်းရင်းသားပါတီများကလည်း ကြေညာချက်တခု ထုတ်၍ စီးပွားရေး ဒဏ်ခတ် ပိတ်ဆို့ထားမှုကို ရုပ်သိမ်းပေးရေးအတွက် ဇန်န၀ါရီလ ၁၅ ရက်နေ့က တောင်းဆိုခဲ့သည်။
“ပိတ်ဆို့ထားတဲ့ အထဲက စီးပွားရေးနဲ့ ပတ်သက်တာတွေကို ရုပ်သိမ်းပေးဖို့ ကြေညာချက်ထုတ်တာပါ။ စီးပွားရေး ရင်းနှီးမြှုပ်နှံတာတွေက ပြည်သူတွေကို ထိခိုက်လို့ တောင်းဆိုတာပါ” ဟု ရှမ်းတိုင်းရင်းသားများဒီမိုကရက်တစ်ပါတီ (SNDP) ခေါ် ကျားဖြူပါတီ၏ ဒုတိယ ဥက္ကဋ္ဌ ဦးစိုင်းဆောင်ဆီ က ဧရာဝတီကို ပြောသည်။
တောင်းဆိုခဲ့ကြသည့် တိုင်းရင်းသားပါတီများမှာ ရွေးကောက်ပွဲဝင်ခဲ့ကြသည့် SNDP၊ ရခိုင်တိုင်းရင်းသားများ တိုးတက်ရေးပါတီ (RNDP)၊ မွန်ဒေသလုံးဆိုင်ရာ ဒီမိုကရေစီပါတီ (AMDP)၊ ဖလုံ-စဝေါ်ပါတီ နှင့် ချင်းအမျိုးသားပါတီ တို့ဖြစ်သည်။
စီးပွားရေးပိတ်ဆို့ထားမှု ဖယ်ရှားရေးသည် စစ်အစိုးရ အပေါ်၌ အဓိကမူတည်နေကြောင်း၊ ထို့ကြောင့် ၎င်းတို့ကိုယ်တိုင် ဒီမိုကရေစီကျသော လမ်းစဉ်ကို လက်တွေ့ကျင့်သုံးရန် လိုကြောင်း၊ လာမည့်လွှတ်တော်သည် ယူနီဖောင်းချွတ် စစ်ဗိုလ်များ၏ အမိန့်အတိုင်း မဖြစ်သင့်တော့ကြောင်း၊ ဒီမိုကရေစီ လမ်းစဉ်ကို လိုက်နာသော လွှတ်တော်သာ ဖြစ်သင့်ကြောင်း မွန် ဒေသလုံး ဆိုင်ရာ ဒီမိုကရေစီပါတီ၏ ဥက္ကဋ္ဌ နိုင်ငွေသိန်းက ဆိုသည်။
ရွေးကောက်ပွဲအနိုင်ရ ပါတီများအနေဖြင့် စီးပွားရေးပိတ်ဆို့မှုကြောင့် မည့်သည့်အရာများက ပြည်သူများအား တိုက်ရိုက်ထိခိုက် နစ်နာစေသည် ဆိုသည့် အချက်ကို ဦးစွာ လုပ်ဆောင်သင့်ကြောင်း၊ ပြည်သူများအတွက် ကြီးမားသော ထိခိုက်နစ်နာမှု များရှိပါက အချက်အလက်များကို စနစ်တကျ ပြုစု၍ တောင်းဆိုသင့်ကြောင်း ဦးဝင်းတင်က ပြောသည်။
Source:irrawaddy
No comments:
Post a Comment